Jumapili, Novemba 3, 2024,
Juma la 31 la Mwaka


Kumb 6:2-6
Zab 18:2-4,47,51
Ebr 7:23-28
Mk 12:23-28

UPENDO WA JIRANI


Somo la kwanza linafuata mtiririko ambapo tunamuona Musa anawakumbusha wana wa Israeli juu ya Amri za Mungu ambazo walizipokea kama watu wa Agano na Mungu. Kushika amri hizi kwa uaminifu kinakuwa ndicho kigezo cha kuingia katika nchi ya ahadi. Kiini cha somo la leo ni “sikiliza Ee Israeli”. Na huu ulikuwa wito wa kwanza kabisa kwa kila Muisraeli mwaminifu. Ikiwa ni sawa na kutii. Sala hii alipaswa kusali Mwisraeli kila siku asubuhi. Israeli kama taifa teule linaitwa daima kumtii Mungu na kumsikiliza. Sisi tunapaswa kuwa watii kwa Mungu na kumsikiliza na kutii mahusia yake. Dhambi inayotumaliza ni kiburi cha kulichulia kawaida neno la Mungu linapo hubiriwa kwetu. Tumekuwa tukiona kana kwamba linawahusu wengine zaidi kuliko sisi. Wakati mwingine linatusema sisi, lakini kwasababu tumesha jihakikishia utakatifu na kujiona tayari tumesha yaelewa mambo ya Mungu, tunafunga masikio na tunaona fundisho hili sio langu nilamtu mwingine.

Katika hili ni wito mkubwa kabisa wa kumsikiliza Mungu kwa uaminifu na kuwa mkweli. Kumsikiliza kwa moyo wote. Kuacha kitu kingine chochote kile ambacho kitachukua nafasi ya Mungu. Kuacha yote na kuweka ufahamu wote kwa Mungu-nguvu yako, moyo wako, akili yako na hata yote ulionayo.

Dhana ya kumpenda jirani kama nafsi yako katika Agano la Kale ipo pia katika kitabu cha (Walawi 19:18). Na hivyo kuunganisha amri zote mbili, kama Yesu alivyofanya katika somo la Injili. Yesu anatukumbusha pia kwamba kumpenda Mungu na kumsikiliza haitengani kabisa na kuacha kuwapenda wanadamu wenzako na kuwasikiliza. Kwa njia nyingine tusimpende Mungu kwa kisingizio cha kumchukia jirani. Upendo wetu kwa Mungu na jirani daima iwe ndio kanuni ya Mfuasi wa Kristo. Tunaweza kusema ndio katiba ya mfuasi wa Kristo.


Ndugu zangu tuchunguze katika maisha yetu, tuanze na Upendo wetu kwa Mungu. Pengine upendo wetu kwa Mungu umekuwa hafifu. Muda wa kumpatatia Mungu ili tuweze kusali pengine umeonekana kubwa msalaba mkubwa. Tumependa mambo yetu zaidi kuliko ule muda wa sala. Hata jumapili tumejiona ni bora tufanye biashara zetu kuliko kwenda kanisani. Kwakweli hapa tunakosa mapendo kwa Mungu. Tumpende Mungu na muda wa sala uvutie na usiwe mzigo kwetu.

Tunakumbushwa pia juu ya mapendo yetu kwa Mwanadamu. Tuchunguze upendo wa Mwanadamu tangu akiwa tumboni mwa mama yake. Utoaji wa mimba ni dalili wazi kwamba upendo wa mwanadamu huyu umepungua kweli. Kutoa mimba kisa unalinda urembo wako, au unaogopa kunyonyesha, unaogopa kuitwa mama. Ni kukosa mapendo. Pia malumbano kati yetu na kutokusameheana ni dalili za kukosa upendo. Vita na vurugu na kuoneana wivu mbaya kwa kweli ni vitu vinavyo dhihirisha kwamba tunakosa mapendo.

Katika somo la Pili tunakumbushwa kwamba sisi tunaye kuhani mkuu ambaye hakuwa na doa lolote ambaye alionesha mapendo makuu kwetu sisi. Tena alikuwa na mapendo makuu kwa mwanadamu hata akakubali yeye mwenyewe kufa ili atukomboe wote bila kumbagua yeyote. Hivyo sisi tuige sifa za kuhani huyu mkuu. Tuwe tayari kujisadaka kwa jili ya wengine, tuwe wakarimu kwa Mungu, tutoe zaka na michango ya kusaidia kueneza injili yake na huu ndio upendo na shukrani kwake. Tusaidie mayatima na wajane, tusiwadhulumu mali zao, tuwatetee kwa kuonesha upendo. Na hii ndiyo ishara ya kwamba tutakuwa tumeelewa ule upendo wa kuhani wetu mkuu ambaye ni Yesu Kristo.