Jumatano, Juni, 17, 2020,
Juma la 11 la mwaka

2Fal 2:1, 6-14;
Zab 30:20-21, 24;
Mt 6:1-6, 16-18

SALA YA KWELI, KUFUNGA NA KUTOA SADAKA!

Karibuni ndugu zangu kwenye tafakari ya neno la Bwana asubuhi ya leo. Leo tafakari yetu inaongozwa na wimbo wetu wa katikati toka zaburi ya 30. Hii ni zaburi aliyoiimba Daudi akiomba msaada mbele ya mwenyezi Mungu. Katika zaburi hii, anasema wafurahi na wapige moyo konde, wale wote wamtumainiao Bwana. Kwa Bwana aliona fadhili ndani yake na huruma nyingi na hivyo basi hata katika kusali kwake, alisali kwa imani kubwa.

Katika masomo yetu ya leo, moyo uliokuwa umejaa imani na matumaini na uliowezakupiga konde na kufurahi mbele ya Bwana ni moyo wa nabii Elia. Leo katika somo la kwanza, anamalizia utume wake kwa mafanikio makubwa na anapewa tuzo la kunyakuliwa na upepo wa kisulisuli na kupelekwa mbinguni. Kweli kwa tuzo aliyopata, alikuwa na kila sababu ya kushangilia na kusema maneno kama haya. Elia alipata changamoto nyingi lakini alijipa moyo na kweli alijipa moyo na kumtumainia Bwana. Kweli wanaoweza kufurahia amani, furaha na ushindi ni wale tu tunaoweza kujipa moyo, na kupiga moyo konde. Tunaokata tamaa kirahisi hakika hatutaweza kuifurahia furaha ya Mungu na ukombozi wake. Basi, sisi tunachangamoto nyingi. Tusikate tamaa kirahisi. Uwezo aliopewa mwanadamu na ulinzi alionao mbele ya Mungu pamoja na hazina ya neema alizowekewa na mwenyezi Mungu si za kumfanya ashindwe kirahisi. Basi, tuwe kama Elisha ambaye leo yeye anaomba apewe roho kama hii ya Elia ili naye basi aweze kulihudumia taifa fla Mungu na kweli aliipewa roho hii, na moyo huu kama wa Elia. Yeye hakuomba roho ya lelemama. Sisi ndugu zangu tuepuke kuomba roho ya ulelemama. Tuombe kujitoa kweli kweli kwa kazi ya Mungu.

Katika somo la injili, Yesu anatufundisha kwamba sala na kufunga ni matendo matakatifu na hivyo yabidi kuchukuliwa kwa umakini. Wengi wetu tunatumia vipindi vya sala kama sehemu ya kujionyesha na kupata sifa mbele ya watu au kutishia watu. Na hivyo tunashindwa kuvuna neema iliyo katika sala. Wengi tumepoteza na kwa namna hii sala imekuwa sehemu ya mchezo mchezo sana. Hivyo, tuwe makini na sala. Sala ni kuongea na Mungu na ndani yake kumejaa neema nyingi. Wengi wetu tungepaswa ukute tumekwisha badilishwa sana kwa vipindi hivi vya sala, tungetakiwa labda ukute tuko mbali sana kiroho hata kimwili lakini kwa sababu ya kutokutumia vipindi hivi vya sala vyema, tumebakia hivihivi tu. Tutumie sala kwa umakini. Tuwaze na kutafakari tunayo sali na kumuomba Mungu maisha yetu yawe sala yenyewe. Tumsifu Yesu Kristo.