Jumatatu, 14/01/ 2019,

Juma la 1 la Mwaka

Ebr 1: 1-6;
Zab 97:1-2.6-7.9
Mk 1: 14-20.

WITO WA MUNGU UNADAI UKARIMU.
Katika somo la kwanza tunasikia habari ya utimilifu wa yule ambaye alitabiriwa na manabii, Yesu mwana wa Mungu ambaye ndiye ufunuo mkamilifu wa Mungu kwetu. Yeye anatupatanisha na Mungu kwani yeye ndiye Mwana mpendwa wa Mungu. Katika Injili tunamsikia huyu mpendwa wa Mungu (Yesu) akianza kazi yake. Yeye alikuja kwa lengo la kutangaza habari njema ya ufalme wa Mungu. Yeye aliona haja ya wafuasi wake kuendeleza dira hii na dhamira ya utume wake. Yesu aliwaita watu wa kawaida ambao katika viwango vya binadamu walionekana hawafai kama vile Simoni na Andrea, Yakobo na Yohane lakini walijitoa wenyewe kwa ukarimu katika maisha mapya kwamba Yesu alikuwa wito wao wakufuata. Haikuwa rahisi lakini walijitoa. Ilikuwa ni maisha ya Injili. Walipata uzoefu wa maisha kwamba Yesu aliishi ndani yao na alikuwa wito wao wa kwenda na kuwa wavuvi wa watu.

Ukarimu na kujitoa wenyewe kwa wafuasi wa kwanza ni mwaliko kwa ajili yetu pia. Hata kwa udhaifu wetu wa kibinadamu Mungu anatupenda na anatutaka tuwe wanafunzi wake. Muda umefika sasa tuyaache maisha yetu ya zamani na tuamue kuishi maisha mapya ya Injili bila kujibakiza nakurudia ya zamani.


Sala:
Bwana, naomba nihisi upendo wako. Unifanye Niishi vyema wito wangu ulionipa. Yesu nakuamini wewe
Amina.