Jumatano, 25 Julai, 2018,
Juma la 16 la Mwaka wa Kanisa

Sikukuu ya Mt. Yakobo, Mtume

2 Kor 4: 7-15;
Zab 125: 1-6;
Mt 20: 20-28

KUJITENGENEZA KATIKA KRISTO!
Mtakatifu Yakobo, ambaye sikukuu yake tunaiadhimisha leo, alikuwa mtoto wa Zebedayo na Salome na kaka wa Yohane Mtume na Mwinjili. Alikuwa ni kati ya wale mitume watatu waliochaguliwa na Yesu ili waweze kutoa ushuhuda juu ya miujiza yake mikuu-kugeuka kwa Yesu sura na pia tukio la Gestemane. Alikuwa maarufu katika Kanisa la Yerusalemu, na alikuwa mtume wa kwanza kufa kwaajili ya Kristo. Alikufa kama shahidi, aliuwawa kwa upanga na Herodi Agrippa wa kwanza.

Injili ya leo, kweli ni neno la uzima kwetu sisi wote. Kwa kweli inaonesha njia ya Maisha Katika maisha ya Ukristo wetu. “kuwa kama Mwana wa mtu aliyekuja, si kutumikiwa bali kutumikia na kutoa maisha yake iwe fidia ya wengi”. “Kama unataka kuwa wa Kwanza, kuwa mtumishi wa wote”. Hili ni la kweli kabisa kwa watu katika, serikali, viongozi katika siasa, walimu shuleni, wafanya biashara, wazazi nyumbani, mapadre katika parokia na watu wote. Ni maneno yanayoenda kinyume kabisa na jinsi ulimwengu unavyotaka sisi tufanye. Mara nyingi tunasikia watu wakijitambulisha kwa vyeo vyao na madaraka waliyo nayo, leo maneno haya ya Yesu yanapaswa yasikike tena katika serikali, mashuleni, katika familia, Kanisani na zaidi sana katika maeneo yote ya kazi za mwanadamu. Mtazamo wa Ulimwengu unalenga kutawala watu. Ni kuwa na mamlaka ili katika mamlaka hayo aweze kufaidika. Na mwisho tutatumikiwa kwa jinsi yeyote tunavyotaka.

Lakini kwa Mkristo ni tofauti! Kuwa Mkristo maana yake nikufikiri kama Kristo, na kutenda kama Kristo. Kuishi maisha ya kweli, ikimaanisha kwamba, kuishi tofauti na malimwengu yanavyotaka tuishi. Injili ya leo inatualika kwenye furaha ya kweli, ambayo ni kutumikia. Na matokeo yake tutaitwa wana wa Mungu na tutashiriki katika karamu ya Mbinguni, hakika katika Maisha ya Mbinguni.

Sala:
Bwana, nisaidiye niweze kutembea katika njia za huduma yako.
Amina.