Jumatatu, Septemba 6, 2021.
Juma la 23 la Mwaka

Kol 1:24-2:3;
Zab 61:6-7, 9;
Lk 6: 6-11


WIVU UNATUFANYA TUSIFIKIRI

Karibuni sana wapendwa kwa adhimisho la misa takatifu asubuhi ya leo. Neno la Bwana leo katika somo la kwanza, Paulo anatangaza kwa Wakolosai kwamba anafurahia kuteseka kwa ajili ya Kristo. Yeye anasema kwamba hachukii kuteseka kwa ajili ya Kristo; aliyapokea mateso haya kama furaha, Yesu alitabiri ujio wa mateso kwa yeyote yule atakayekuwa mfuasi wake. sasa yametokea kwa Paulo na hivyo anaonesha ukomavu mkubwa kwa kuyapokea, na kuyafurahia.

Hii ndiyo tabia mojawapo ya mfuasi wa Kristo, mfuasi hapaswi kuogopa msalaba. Paulo aliweza kuyapokea mateso yake kwa sababu aliyaunganisha na yale ya Kristo, kwa ajili ya ukombozi wa ulimwengu na hivyo aliweza kuyafurahia mateso yake na ndani yake kuona neema kubwa, ndani ya mateso hayo.

Sisi tujifunze toka kwa Paulo, tuyaunganishe mateso yetu yote na Kristo.Tunapoyaunganisha mateso yetu pamoja na Kristo, hapa tunaweza kutambua aina za mateso-kwamba yapo mateso tunayojisababishia, yanayoletwa na ujinga wetu, na mengine ni kwa ajili ya Kristo. Kristo atatufundisha kuachana na yale yasababishwayo na ujinga wetu, tamaa zetu, chuki zetu na kuyaacha yale kwa ajili ya ukombozi wetu, na watu wake. tumwombe Bwana Yesu leo atufundishe kuachana na yale mateso au misalaba isababishwayo na ujinga, kiburi, tamaa na uongo wetu. Haya ndiyo yaanayotuchakaza. Tuwe tayari kutupa misalaba ya ulevi, uasherati; yote haya yanachakaza miili yetu.

Katika somo la injili, Yesu anakuwa tayari kumponya aliyepooza siku ya Sabato. Yesu anaongozwa na upendo na huruma kwa huyu mgonjwa. Hivyo aliweza kushiriki katika mateso ya huyu mgonjwa. Sisi tujifunze kushiriki katika mateso ya wenzetu pia. Anapofika maskini kuomba msaada, tuyafikirie mateso anayokumbana nayo kwanza, fikiria maumivu yake, fikiria dharau na adha nyingine anazokumbana nazo; hili lituongoze kuwatumikia hawa wenzetu mara nyingi. Pia tufurahie pale wenzetu watendapo mema. Mafarisayo na waandishi wamekasirishwa kwa Yesu kutenda mema.

Wapo kati yetu ambao wakisikia kwamba tumetenda wema fulani, wao hukasirika-lazima tupinge roho za namna hii. Tufurahie pale wenzetu watendapo wema. Ukiona moyo wako unakasirika kwa sababu mwenzako katenda wema fulani, utambue kwamba tayari shetani ameshakutawala. Akili za wafarisayo na waandishi zilionesha kutawaliwa na shetani na ndio maana walichukizwa kumwona Yesu akitenda mema.