Februari 4, 2021, Alhamisi

Ebr. 12:18-19, 21-24
Zab. 48:1-2, 8-10 (K) 9
Mk 6:7-13

SAFARI ISIYO HITAJI MIZIGO

Karibuni ndugu zangu kwa tafakari ya neno la Mungu asubuhi ya leo katika adhimisho la Misa Takatifu. Zaburi yetu ya wimbo wa katikati leo inatuambia juu ya kutafakari fadhili na upendo wa Bwana katikati ya hekalu lake. Hii ni zaburi inayoimbwa na roho iliyotulia na yenye shukrani, inayokaa chini kutafakari namna jinsi baraka za Mungu zilivyo kuu.
Zaburi hii inatumika kusisitizia ujumbe wa somo la kwanza toka katika waraka kwa Waebrania. Hapa tunakutana na ujumbe juu ya ukaribu na upendo kati yetu na Mungu. Kristo ndiye aliyefanikisha yote haya. Mwandishi wa waraka huu anasema kwamba sisi tumekuja sehemu takatifu, ambapo hatuogopi, sasa tupo katika urafiki mkuu na Mungu wetu.
Analinganisha na lile kutaniko kati ya Mungu na wana wa Israeli pale mlimani Sioni. Hapa, wana wa Israeli waliogopa hata kusikia sauti ya Mungu. Wakiwa na Mungu waliona hofu. Lakini cha ajabu ni kwamba sisi tukiwa na Mungu, ni urafiki, amani na utulivu. Kristo ndiye aliyefanikisha yote haya. shukrani kwa Kristo wetu. Zamani za Agano la kale, hata aliyelikaribia sanduku la Agano kama hastahili, alikufa palepale.
Lakini Kristo amekwisha tuleta karibu na Baba yake. Sisi tusitumie vibaya huu ukaribu unaoletwa na Kristo. Wengi wetu tunautumia kumdharau au kufikiri kwamba Mungu hana tena nguvu siku hizi. Tusitake kumjaribu Mwenyezi Mungu. Tutumie huu urafiki vizuri. Hasa wakati wa kupokea Ekaristi-tuje kwa adabu. Tusitake Mungu arudie zile zama za sanduku la Agano-hakuna aliyethubutu kulikaribia hivihivi.
Tusitumie huruma ya Mungu vibaya. Tuviheshimu vitakatifu. Biblia, rozari na misalaba iwekwe sehemu safi. Isiachwe katika vumbi. Tusitake laana hivihivi.
Katika injili yetu, Yesu anawatuma wanafunzi wake kulihubiri neno lake. Anawaeleza wakiingia mjini kama hawakaribishwi au kusikilizwa, basi wakungute mavumbi miguuni mwao. Kukunguta mavumbi ni alama ya laana kwa wale wanaoikataa injili. Wanafunzi wa Yesu hawapaswi kuwa wepesi wa kukunguta mavumbi. Wanapaswa kufanya bidii sana ya kuongoa, wawe na upendo. Wasikungute mavumbi kabla hata ya kuanza utume. Sisi ndugu zangu tunakunguta mavumbi kirahisi mno, ndio shida yetu. Tunapaswa kuzidisha bidii zaidi.