Desemba 28, 2020.
------------------------------------------------
JUAMTATU, OKTAVA YA NOELI

Sikukuu ya Watoto Mashahidi,

Somo la 1: 1Yn 1:5 – 2:2 Yohana anatuambia kwamba sisi ni wakosefu tunamuhitaji Kristo. Jitihada yake kubwa ni kutusaidia sisi tuwe mbali na dhambi.

Wimbo wa Katikati: Zab 123:2-5,7-8 Maisha yetu, kama ndege, yameokoka katika mtego wa wawindaji, kwani msaada wetu upo katika jina la Bwana aliyeumba mbingu na nchi.

Injili: Mt 2: 13-18 Mathayo analinganisha kwenda kwa mtoto Yesu Misri na mauaji ya watoto wachanga-watoto wote wa kiumbe wenye umri chini ya miaka miwili. Hawa watoto watakatifu waliuwawa kwasababu ya Kristo. Walimfuata Mwanakondoo asiye na hatia, na kutangaza milele utukufu wa Bwana.

------------------------------------------------

MUNGU ANAWEZA KUFANYA MAMBO YOTE KUWA MAPYA!

Karibu ndugu zangu katika adhimisho la misa Takatifu, leo tuna adhimisha sikukuu ya Watakatifu Watoto Mashahidi: hawa tunasikia habari zao katika injili ya leo. Wanauawa kwa ajili ya Kristo bila hatia na Herode aliyetaka kulinda ufalme wake. Mtoto aliyehofiwa alikuwa mmoja tu lakini hofu yake inapelekea kuuawa kwa watoto wasiofahamu hata maana ya ufalme. Yote haya ni kwa sababu ya uchu wa madaraka.

Lakini siku zote uovu hauwezi kuushinda wema. Yesu aliokolewa na kupelekwa Misri na hivyo ufalme wake ulizidi kubakia. Herode alikufa muda mfupi baadaye na kupoteza ufalme. Alipokufa alikuta watoto aliowateketeza kama wafalme-mashahidi mbinguni wakikalia viti kumi na viwili na kuwahukumu makabila yote kumi na mbili ya Israeli (Mt 19:28). Hivyo, kumshuhudia Yesu hakuna umri, jinsia au rika. Awe mtoto au mzee anapaswa kumshuhudia Yesu.

Kingine ndugu zangu nyakati zetu tunaweza kuwa na Maherode wengi wanao winda roho za watoto wachanga wakiwa tumboni mwa Mama zao na kuwatoa mimba. Yaweza kuwa wanafanya hivyo kwa hofu ya kuogopa kuitwa Mama au kupoteza uzuri wake kwani atanyonyesha na watu watafahamu kwamba sasa ana mtoto na hivyo hatapata tena wanaume wakumpenda. Hawa hawana tofauti sana na Herode, tunaweza kumlaumu Herodi lakini pengine sisi wenyewe ni Maherode, wale wanaouza dawa za kutolea mimba, wenye kushauri watu watoe mimba, wazazi wanaotoa mimba kisa eti mtoto amekuja wakati ambao sio wenyewe, hatuna tofauti na Herode.

Tutetee watoto wachanga tangu akiwa tumboni mwa mama yake, hatuwezi kusema sisi tupo huru kuangamiza maisha ya wengine. Hakuna Mwanadamu aliyepewa uhuru wa namna hii. Ni Mungu mwenyewe mwenye kuleta uhai na mwenye mamlaka ya kuuchukua. Kama tumefanya hivi tuache na kumrudia Mungu.

Pia tusi waangamize wenzetu kwa hofu ya kuogopa kupoteza umaarufu wetu. Tusiogope kujiunga nao watufundishe. Tukiwa katika nia hii, tuenende katika nuru yake na tuziungame na kuzisafisha dhambi zetu kwa damu yake, kama tunavyoambiwa katika somo la kwanza.