Desemba 18, 2020.
------------------------------------------------
IJUMAA, JUMA LA 3 MAJILIO

Somo la 1: Yer 23: 5-8 Yeremia anatabiri kwamba Bwana “atachipusha shina lenye haki kwa Daudi; kama Mfalme atatawala kwa hekima.”.

Wimbo wa katikati Zab 72: 1-2, 12-13, 18-19 katika siku zake itachanua na haki mpaka mwezi ukome. Atakuwa na huruma kwa wanyonge na kuwaokoa maskini.

Injili: Mt 1: 18-24 Malaika wa Mungu alimtokea Yosefu katika ndoto na kumwambia kwamba, Mimba aliyo nayo Maria ni kwa uwezo wa Roho Mtakatifu. Na kwamba ataitwa “Emanuel, yaani Mungu pamoja nasi”

------------------------------------------------

MUNGU ANANYOOSHA MISTARI ILIYOPINDISHWA

Karibuni ndugu kwa adhimisho la Misa Takatifu asubuhi ya leo. Wavumilivu ndio wanaomkaribisha Bwana.

Injili ya leo inatuambia jinsi kuzaliwa kwa Yesu kulivyokuwa-kuzaliwa huku kulisaidiwa na kitendo cha wazazi wake kuwa wasikivu na wavumilivu. Uvumilivu na usikivu ulianzia kwa Maria aliyekubali kuchukua mimba bila ya kuwa na mume hali akijua kwamba suala hili lingalimsababishia hatari kubwa kwa jamii yake, familia yake na hata uhai wake na maisha yake ya baadaye.

Usikivu na uvumilivu mwingine ulitoka kwa Yosefu aliyekubali kusikia sauti ya malaika na kumpokea Maria bila ya kujali jamaa yake itakavyomuona kwa yeye kukubali kukiuka mila za jamii yake-kwani kitendo cha Yosefu kumpokea Mariamu akiwa na mimba-kilimuweka hatiani, kilimfanya aonekane kama asiye na subira. Lakini uvumilivu wake na usikivu wake ulituletea ukombozi.

Sisi tujifunze kujitoa sadaka kwa ajili ya wenzetu. Ni kwa njia ya kupigika kwetu wenzetu wanaweza kupona. Tusipopigika na kusubiri wengine wapigike kwa ajili yetu, hakika tutaishia katika kilio kila siku. Baba lazima akubali kupigika kwa ajili ya watoto wake wapate maisha bora. Akiwa mvivu, hakuna hata mtoto wake atakayefurahia baadaye. Hata madaktari-wasipopigika na kukesha usiku mzima wakisoma na kufanya research, magonjwa yataizidia dunia. Kwa kupigika kwao, sisi tunapona. Kwa polisi wetu kupigika na baridi usiku au matrafiki kupigwa jua mchana barabarani ndio sisi tunafurahia usalama. Tukubali kupigika. Tusitegemee kila siku kula kwa wengine.

Somo la kwanza nabii Yeremia anatoa matumaini kwamba siku zitakuja atakapochipusha toka katika shina la Daudi tawi litakalouletea ulimwengu haki. Siku zake Yuda atafurahi. Viongozi wengi wa Yuda walishindwa kuuletea ulimwengu furaha hii kwa sababu ya kushindwa kujitoa sadaka kwa ajili ya wengine, wakaishia kupiga dili, kuwa mabwana na dunia ikashindwa kupona. Sisi tuepuke kuwa mabwana, tupigike kwa ajili ya wengine.