Jumanne, Novemba 24, 2020,
Juma la 34 la Mwaka wa Kanisa

Ufu 14:14-19;
Zab 95:10-13;
Lk 21:5-11

KUJIANDAA KWA MWISHO WA ULIMWENGU!

Karibuni ndugu zangu kwa adhimisho la Misa Takatifu asubuhi ya leo. Leo neno la Bwana linaanza kwa kuliangalia somo la kwanza na hapa tunakutana na malaika akitumwa kutangaza ujio wa mwisho wa maisha ya dunia kwa kutumia lugha ya kuvuna mazao ya dunia. Wanadamu wa dunia wanaonekana kuwa kama mazao ambayo mkulima atayavuna. Nafaka njema ataikusanya ghalani, mbovu itaharibiwa.

Mfano huu unaonyesha hali halisi ya mwanadamu; ama kweli mwanadamu anayo kila sababu ya kuacha kujivuna, na kutulia na kujiweka zaidi mikononi mwa Mwenyezi Mungu. Tunapaswa kuwa mazao bora tukubaliwe na mkulima. Tujipalilie kwa njia ya sala, huruma, ukarimu, upole na unyenyekvu. Tuepuke matendo yanayotufanya tukose afya kama uzinzi, moyo usiosamehe, ulevi, maneno machafu na picha chafu. Haya yanatudhoofisha, tunabakia na mawazo mazito, hatusongi mbele. Yanatufanya pia tuwe maskini wa kifedha. Wengi kati yetu ni maskini kwa sababu ya kutumia pesa kuzini ovyo na kunywa kupita kiasi. Yametukosesha na familia zetu na kuwafanya watoto wetu wabakie bila elimu au ujuzi wa kufaa. Mwishowe yanatukosesha mbingu. Sisi tujipalilie na tusikubali kuwa dhaifu.

Katika injili, Yesu anaeleza kwamba nyakati za mwisho kutatokea magumu mengi yatakayosumbua imani yetu. Ni imani iliyotulia tu ndio itakayoweza kuyashinda magumu haya.

Hii ni kweli ndugu zangu, bila imani tulivu na imara hatutayaweza haya magumu. Haya magumu yanatutokea kila siku na kukumbana na vishawishi. Ukipita unakuta vibao vinakuambia jiunge freemason, au kuna mganga anayesafisha nyota au ingia kwenye biashara fulani haramu. Tayari walio na tamaa na uchu wa mali wameiacha imani yao na kujaribu kujiunga hivi vikundi. Haya yote yatatokea na wengi watapotea sana. Ni wale tu wenye imani thabiti watakaoweza kustahimili kuyashinda magumu haya na kuruhusu wasiyumbishwe na vishawishi hivi. Sisi tuzidishe unyenyekevu kama wanaotambua kwamba muda sio mrefu itatubidi kuvunwa kama mavuno. Tuzidishe imani ili ajapo mvunaji atukute tukiwa na afya njema.