Jumanne, Januari 7, 2020,
Juma baada ya Epifania.

1 Yoh 4: 7-10;
Zab 72: 1-4, 7-8;
Mk 6: 34-44.

KUTAMANI UTAKATIFU!

"Si kwamba sisi tulimpenda Mungu kwanza, bali Yeye alitupenda kwanza." Anaendelea kutujalia neema zake kwasababu ya huruma yake. Hata hivyo, watu wengi hawajitahidi kutafuta ukamilifu kama Watakatifu; huku wakifikiri kwamba sisi ni watu wa kawaida tu hatuwezi kufanya mambo makubwa kama wao. Kwa kweli, sisi hatujaribu hata kuwaiga kwasababu tunafikiri sisi ni watu dhaifu na wadogo mno. Kwa njia hii, sisi tunajifungia wenyewe kutopata neema ya Mungu, na hivyo kujifungia wenyewe kutohisi upendo wa Mungu kwetu. Injili anasimulia tukio la Yesu kulisha watu elfu tano kwa mikate mitano na samaki wawili tu. Yeye anaufurahisha umati mkubwa wa watu. Haya ndiyo anayofanya kila siku kwetu, Yesu anaendelea kutupa neema yake kila siku, ili mradi sisi tuitumie vizuri kukua katika utakatifu na wala Yesu haitaji kitu kingine kwetu zaidi ya sisi kuwa watakatifu.

Sala:
Bwana, washa ndani yangu tamaa na bidii ya kutembea katika maisha ya utakatifu.
Amina.