← Masomo yote Rangi Nyeupe

Sikukuu ya Mt. Yohane Mtume na Mwinjili

Jumatano, 27 Desemba 2017 · Mwaka B

Somo la Kwanza

1 Yoh 1:1-4

Lile lililokuwako tangu mwanzo, tulilolisikia, tuliloliona kwa macho yetu, tulilolitazama, na mikono yetu ikalipapasa, kwa habari ya Neno la uzima; (na uzima huo ulidhihirika, nasi tumeona, tena twashuhudia, na kuwahubiri ninyi ule uzima wa milele, uliokuwa kwa Baba, ukadhihirika kwetu); hilo tuliloliona na kulisikia, twawahubiri na ninyi; ili nanyi pia mpate kushirikiana nasi: na ushirika wetu ni pamoja na Baba, na pamoja na Mwana wake Yesu Kristo. Na haya twayaandika, ili furaha yetu itimizwe.

Neno la Bwana. — Tumshukuru Mungu.

Wimbo wa Katikati

Zab 97:1-2, 5-6, 11-12

Enyi wenye haki, mfurahieni Bwana

Bwana ametamalaki, nchi na ishangilie,

Visiwa vingi na vifurahi.

Mawingu na giza vyamzunguka,

Haki na hukumu ndio msingi wa kiti chake.

K. Enyi wenye haki, mfurahieni Bwana

Milima iliyeyuka kama nta mbele za Bwana,

Mbele za Bwana wa dunia yote.

Mbingu zimetangaza haki yake,

Na watu wote wameuona utukufu wake.

K. Enyi wenye haki, mfurahieni Bwana

Nuru imemzukia mwenye haki,

Na furaha wanyofu wa moyo.

Enyi wenye haki, mmfurahieni Bwana,

Na kulishukuru jina lake takatifu.

K. Enyi wenye haki, mfurahieni Bwana

Shangilio la Injili

Shangilio

Aleluya, aleluya,

Ee Mungu, tunakusifu, tunakukiri kuwa Bwana. Jamii tukufu ya Mitume inakusifu.

Aleluya.

Injili

Yn 20:2-8

Siku ya kwanza ya juma, Mariamu Magdalena alikwenda mbio, akafika kwa Simoni Petro na kwa yule mwanafunzi mwingine ambaye Yesu alimpenda, akawaambia, Wamemwondoa Bwana kaburini, wala hatujui walikomweka. Basi Petro akatoka, na yule mwanafunzi mwingine, wakashika njia kwenda kaburini. Wakaenda mbio wote wawili; na yule mwanafunzi mwingine akaenda mbio upesi kuliko Petro, akawa wa kwanza kufika kaburini. Akainama na kuchungulia, akaona vitambaa vya sanda vimelala; lakini hakuingia. Basi akaja na Simoni Petro, akaingia ndani ya kaburi; akavitazama vitambaa vilivyolala, na ile leso iliyokuwako kichwani pake; haikulala pamoja na vitambaa, bali imezongwa-zongwa mbali mahali pa peke yake. Basi ndipo alipoingia naye yule mwanafunzi mwingine aliyekuwa wa kwanza wa kufika kaburini, akaona na kuamini.

Injili ya Bwana. — Sifa kwako, Ee Kristo.

0 Maoni

WhatsApp Facebook

Tafakari ya masomo haya Tafakari ya Jumatano, 27 Desemba 2017 →

Maoni (0)

Bado hakuna maoni. Kuwa wa kwanza kutoa maoni.

Ingia utoe maoni