Masomo ya Misa: Alhamisi ya 16 ya Mwaka, Alhamisi, 23 J

Somo la Kwanza

Yer 2:1–3, 7–8, 12–13

Neno la Bwana likanijia, kusema, Enenda ukalie masikioni mwa Yerusalemu, ukisema, Bwana asema hivi, Nakumbuka hisani ya ujana wako, upendo wa wakati wa uposo wako; Jinsi ulivyonifuaata huko jangwani, katika nchi isiyopandwa mbegu. Israeli walikuwa utakatifu kwa Bwana; Malimbuko ya uzao wake; Wote watakaomla watakuwa na hatia; uovu utawajilia; asema Bwana. Nami nitawatia katika nchi ya shibe, mpate kula matunda yake na mema yake; lakini ninyi mlipoingia katika nchi ile, mliitia unajisi nchi yangu, na urithi wangu mliufanya kuwa chukizo. Makuhani hawakusema, Yuko wapi Bwana? Wala wanasheria hawakunijua; wachungaji nao waliniasi, nao manabii walitoa unabii kwa Baali, wakafuata mambo yasiyofaidia kitu. Enyi mbingu, staajabuni kwa ajili ya jambo hili, mkaogope sana, na kuwa ukiwa sana, asema Bwana. Kwa maana watu wangu hawa wametenda maovu mawili; wameniacha mimi, niliye chemchemi ya maji ya uzima, wamejichimbia mabirika, mabirika yavunjayo, yasiyoweza kuweka maji.

Neno la Bwana. — Tumshukuru Mungu.

Wimbo wa Katikati

Zab 36:5–10

K.

Kwako Bwana iko chemchemi ya uzima.

Ee Bwana, fadhili zako zafika hata mbinguni,
Uaminifu wako hata mawinguni.
Haki yako ni kama milimo ya Mungu,
Hukumu zako ni vilindi vikuu.

K. Kwako Bwana iko chemchemi ya uzima.

Ee Bwana, unawaokoa wanadamu na wanyama.
Ee Mungu, jinsi zilivyo na thamani fadhila zako!
Wanadamu huukimbilia uvuli wa mbawa zako.
Watashibishwa kwa unono wa nyumba yako,
Nawe utawanywesha mto wa furaha zako.

K. Kwako Bwana iko chemchemi ya uzima.

Maana kwako Wewe iko chemchemi ya uzima,
Katika nuru yako tutaona nuru.
Uwadumishie wakujuao fadhili zako,
Na wanyofu wa moyo uaminifu wako.

K. Kwako Bwana iko chemchemi ya uzima.

Shangilio la Injili

Zab 147:12, 15

Aleluya, aleluya,
Msifu Bwana, ee Yerusalemu, huipeleka amri yake juu ya nchi.
Aleluya.

Injili

Mt 13:10–17

Wanafunzi walimwambia Yesu, Kwa nini wasema nao kwa mifano? Akajibu akawaambia, Ninyi mmejaliwa kuzijua siri za ufalme wa mbinguni, bali wao hawakujaliwa. Kwa maana yeyote mwenye kitu atapewa, naye atazidishiwa tele; lakini yeyote asiye na kitu, hata kile alichonacho hata kile alicho nancho atanyang’anywa. Kwa sababu hii nasema nao kwa mifano kwa kuwa wakitazama hawaoni, na wakisikia hawasikii, wala kuelewa. Na neno la nabii Isaya linatimia kwao, likisema, Kusikia mtasikia, wala hamtaelewa; kutazama mtatazama, wala hamtaona. Maana mioyo ya watu hawa imekuwa mizito, na kwa masikio yao hawasikii vema, na macho yao wameyafumba; wasije wakaona kwa macho yao, wakasikia kwa masikio yao, wakaelewa kwa mioyo yao, wakaongoka, nikawaponya.
Lakini, heri macho yenu, kwa kuwa yanaona; na masikio yenu, kwa kuwa yanasikia. Kwa maana, amin, nawaambia, Manabii wengi na wenye haki walitamani kuyaona mnayoyaona ninyi, wasiyaone na kuyasikia mnayoyasikia ninyi, wasiyasikie.

Injili ya Bwana. — Sifa kwako, Ee Kristo.

Maoni (1)

Sebastian Mavukilo · 23 Julai 2026

Tumsifu Yesu Kristo wapendwa, Leo tunaona Mungu anavyotukumbusha kipindi tulipokuwa watii na neema na ulinzi ambao anatupatia katika hali hiyo. Pia, anaonyesha masikitiko makubwa kutokana na uhasi na mioyo migumu yetu ambayo hupelekea mambo mengi mema aliyotupanhia kuhalibika, tunayanajisi sisi wenyewe. Mioyo hii migumu alikutana nayo pia Bwana wetu Yesu Kristo, aliye chemchemi na asili ya uzima wetu, na kweli yote. Lakini licha ya watu kumuona na kuzungumza nae, bado hawakutaka kusadiki. Hali ilimlazimisha kutumia mifano ili angalau kuwarahisishia watu kuelewa au kutoa hofu kidogo. Hivyo, na sisi leo, tumwombe Mungu atujalie nguvu za Roho wake Mtakatifu ili tuwe na mioyo myepesi, yenye kupokea na kuliishi NENO la Mungu.

Ingia utoe maoni