Alhamisi, Desemba 9, 2021,
Juma la 2 la Majilio

Isa. 41:13-20
Mt. 11:11-15

Karibuni sana wapendwa wa Bwana kwa tafakari ya neno la Bwana asubuhi ya leo. Bwana Mungu wa Israeli anazidi kutoa unabii wa matumaini kwa wana wa Yuda walioko uhamishoni Babuloni. Anawaeleza kwamba yeye ndiye Mungu, ndiye mwenye uwezo wa kuwashika mkono, ndiye mwenye uwezo wa kuwasaidia. Hivyo wasiogope, kwani mkuu wao ni Bwana. Anamwahidia kumfanya kama chombo kikali cha kupuria, chombo kinachopendwa na kila mmoja kwani kinazalisha nafaka safi, Yuda atakuwa na mamlaka tena, na sauti mbele ya watu.
Maneno haya yanasemwa kwa Yuda wakati wakiwa utumwani, huko wapo katika shida na wanatamani maisha ya Wababuloni, wanawaona Wababuloni kama walio barikiwa zaidi na wenye Mungu bora. Wao wanajidharau kama waliotupwa. Nabii anawaeleza kwamba kwa hakika wasijidharau, wao ni watu walio na thamani bora machoni pa Mungu. Ipo siku Mungu atawakumbuka.
Ujumbe huu utusaidie na sisi. Tuepuke kujidharau, yawezekana tukawa tunakosa fedha mifukoni mwetu, tukakosa hata maarifa, tukawa tegemezi tu, tukakumbwa pia na magonjwa mengi na kutudhoofisha. Lakini tutambue kwamba katika hali za namna hiyo, bado tu wa thamani machoni pa Bwana. Hivyo tusichoke kumwamini Mungu wetu, Mungu ni wetu pia. Mungu sio wa watu fulani fulani tu, au wenye afya, Mungu ni baba yetu pia. Hivyo tuache kujidharau sana. Mungu sio mbaguzi kwa watu fulani fulani tu. Mungu anazidi kuwa wetu na mwenye kutupenda hata katika magumu yetu pia.
Katika somo la injili, Yesu anamsifu Yohane Mbatizaji. Ni mtu ambaye maisha yake yote aliyatolea kwa ajili ya mwingine, kumwandalia Yesu njia. Maisha yake alidiriki hata kuishi jangwani na kula nzige na asali ya mwitu lengo likiwa ni kuwaongoza wanadamu watubu, watazame kwamba bidhaa na biashara za jamii tunazoishi nyingi ni haramu. Zipo zinazopatikana kwa wizi na dhuluma. Tunaposhiriki katika ulaji wa bidhaa fulani mara nyingine tunasaidia watu waovu kuendelea kukuza biashara zao na kupata nguvu zaidi.
Yohane alikula chakula cha mwituni na hivyo aliweza kuepuka kuikwaza jamii kwani hakula vitu vya dhuluma. Yohane aliishi maisha yake yote akimtengenezea Yesu njia. Hapa alipata ukuu wake. Sisi tuwe watu wa kuwandalia njia wenzetu.
Tukiona walio na vipaji vya mambo mbalimbali-tuwaandalie njia, tukiona wanaotaka kuishi maisha ya utakatifu tuwaandalie njia. Kwa namna hii tutaweza kuwa wenye ukuu katika ufalme wa Mungu kama Yohane. Pia anayewaandaa wengine wapate kumwamini Yesu kwa mara nyingine pia hupata nafasi ya kuwa wakuu kwenye ufalme wa Mungu. Hivyo tuwe watu wenye kukubali kuwaandalia wenzetu njia. Tumsifu Yesu Kristo.