Alhamisi ya 11 ya Mwaka

Nabii Eliya alisimama, kama moto, hata na neno lake likawaka kama tanuru. Yeye alileta njaa kuu juu yao, na kwa juhudi yake akawapunguzia hesabu yao; kwa neno la Bwana akazifunga mbingu, na mara tatu kutoka huko akatelemsha moto. Jinsi ulivyotisha kwa miujiza yako! Aliye mfano wako ataona fahari. Aliyekufa ulimfufua katika mauti, kutoka kuzimu, kwa neno la Bwana. Ukawashusha wafalme mpaka shimoni, na watu wateule vitandani mwao.Ukapaka mafutawafalme wa kisasi, na nabii ili akufuate nyuma yako. Ulisikia makaripio huko Sinai, na hukumu za kisasi huko Horebu. Ukachukuliwa juu katika kisulisuli, katika gari la farasi wa moto. Ukaandikiwa kuwa umeleta makemeo, ili kutuliza hasira siku ile ya Bwana; kugeuza moyo wa baba umwelekee mwana na kuhusisha j=kabila za Israleli. Bilshaka wamebarikiwa wale waliokuona kwa macho, wakafa; lakini wewe umezidi kubarikiwa, kwa maana unaishi. Ndiye huyo Eliya aliyefunikwa kwa kisulisuli; hata Elisha naye akajazwa roho yake; akazidisha ishara maradufu, na yale yaliyotoka kinywani mwake yalikuwa ajabu. Siku zake zote huyu pia hakushawishiwa kwa kumuogopa mwenye kutawala, wala hakutiishwa na mtu ye yote. Hakukutokea neno lililokuwa gumu la kumshinda, hata na alipolala mautini mwili wake ulitoa unabii; kama alivyofanya miujiza katika maisha yake, kadhalika katika mauti yake kazi zake zikawa za ajabu.

Bwana ametamalaki, nchi na ishangilie, Visiwa vingi na vifurahi.
Mawingu na giza vyamzunguka, Haki na hukumu ndio msingi wa kiti chake.
(K)Enyi wenye haki mfurahieni Bwana

Moto hutangulia mbele zake, Nao huwateketeza watesi wake pande zote.
Umeme wake uliuangaza ulimwengu, Nchi ikaona ikatetemeka.
(K)Enyi wenye haki mfurahieni Bwana

Milima iliyeyuka kama nta mbele za Bwana, Mbele za Bwana wa dunia yote.
Mbingu zimetangaza haki yake, Na watu wote wameuona utukufu wake.
(K)Enyi wenye haki mfurahieni Bwana

Na waaibishwe wote waabuduo sanamu, Wajivunao kwa vitu visivyofaa;
Enyi miungu yote, msujuduni Yeye.
(K)Enyi wenye haki mfurahieni Bwana