Sikukuu ya Mt. Mathia Mtume

Siku zile akasimama Petro kati ya hao ndugu (jumla ya majina ilipata mia na ishirini), akasema, Ndugu, ilipasa andiko litimizwe, alilolinena Roho Mtakatifu zamani kwa kinywa cha Daudi, katika habari za Yuda aliyewaongoza wao waliomkamata Yesu; kwa sababu alikuwa amehesabiwa pamoja na sisi, akapata sehemu ya huduma hii. Kwa maana imeandikwa katika chuo cha Zaburi, Kikao chake na kiwe ukiwa, Wala asiwepo mtu mwenye kukaa humo; Basi katika watu waliofuatana nasi wakati wote Bwana Yesu alipokuwa akiingia na kutoka kwetu, kuanza tangu ubatizo wa Yohana, hata siku ile alipochukuliwa kwetu kwenda juu, inapasa mmoja wao awe shahidi wa kufufuka kwake pamoja nasi. Wakaweka wawili, Yusufu, aitwaye Barsaba, aliyekuwa na jina la pili Yusto, na Mathiya. Kisha wakaomba, wakasema, Wewe, Bwana, ujuaye mioyo ya watu wote, tuonyeshe ni nani uliyemchagua katika hawa wawili, ashike mahali katika huduma hii na utume huu, alioukosa Yuda, aende zake mahali pake mwenyewe. Wakawapigia kura; kura ikamwangukia Mathiya; naye akahesabiwa kuwa pamoja na mitume kumi na mmoja.

Haleluya. Enyi watumishi wa Bwana, sifuni, Lisifuni jina la Bwana.
Jina la Bwana lihimidiwe Tangu leo na hata milele.
(K)Amketisha pamoja na wakuu, pamoja na wakuu wa watu wake

Toka maawio ya jua hata machweo yake Jina la Bwana husifiwa.
Bwana ni mkuu juu ya mataifa yote, Na utukufu wake ni juu ya mbingu.
(K)Amketisha pamoja na wakuu, pamoja na wakuu wa watu wake

Ni nani aliye mfano wa Bwana, Mungu wetu aketiye juu;
Anyenyekeaye kutazama, Mbinguni na duniani?
(K)Amketisha pamoja na wakuu, pamoja na wakuu wa watu wake

Humwinua mnyonge kutoka mavumbini, Na kumpandisha maskini kutoka jaani.
Amketishe pamoja na wakuu, Pamoja na wakuu wa watu wake.
(K)Amketisha pamoja na wakuu, pamoja na wakuu wa watu wake